Khrismass Lungawinak

Khrismass Lungawinak

December 2006

Khrismass Ziangtin kan hmang cio pei?Thla a tang I khua a sik, zing summei le daitla in zilthli nemte a daiter. ZIngdai ah running cucik kharbawk le vate tla awn-ai loten dai thepthi hai maw! Zumtu pawl tla Lal pian campha hmuak dingin tim an tuah, an timlam in khuang hri an dirrin. Nauhak pawl tla santa in ziang laksawng pe hai kei maw tiah hngak hlap zetin an tur an cai! Aw, Khrismass, leihring nun milai tla in kan lo hmuak e! Khrismass hmandan a bang aw lo cio. Mi hrekhat in voksa thau ei ding an hngak, mi hrekhat in khuang hla sak in zanmen le rualpi pawlkom awknak an hngak, mi hrekhat in santa le candy tete an hngak, mi hrekhat in thusim thiamthiam awkam phur an hngak, mi hrekhat in rualpi tha le sungkhat hnen ihsin laksawng thatha le mawimawi an hngak, mi hrekhat in duhdawtmi thawn cantha hmang tlang ding an hngak, mi hrekhatin an thinlung sangkaa awng aw aw in Khrih tlarau rung leng dingin an hngak, mi hrekhat in khrismass hmang ve dingin ei ding le sumpai nei lo, rualpi nei lo mi farah pawl bawm dingin le thinlung daihnak pe dingin cantha an hnak, aw, ka rual, nangteh ziang na hngak ve! Na awmsung ah a cambang mi na hngak mi kha ruat hnik aw! A tuvek lal pian campha ah na awmsung lo tur ter et-o tu kha ziangha a si! Daihnak, rualremnak, thuthentu Pathian cu lei taksa thuam aw aw in a ra pian campha kan lawm e!Kan umnak leilung pi cu farahnak, riahsiatnak, dodal awknak, terrorist, nuclear ralthuam, thlisia le ruahsia, nattha lolo, leitlun ram pakhat le pakhat rem awk lonak, el tai awknak, leitlun bungrua leisung suak thil le ri cuh awknak, zuam awknak phunphun, le thiltha lo tampi in a tuam. Mi tampi cu nitin nunah hminthannak, porhawknak, sinak, nuam nung cennak, rualpitha, tvp. hawlin lusam mang loin an zuang an zam. Mi hrekhat cu midang lungawinak cemral ter tahrat in thinlung diriamnak an hawl, mi hrekhat cu midang lungawinak rianin anmai lungawinak an hloh phah. Mi hrekkhat cu anmai milai pi tih in an khur ih mi hrekhat cu an dunglam thusia in a tawntem ih sal ah a tuah. Mi hrekhat cu an hmailam ah a thleng dingmi an tih ruangah an tihnak in sal ah a canter. Mi hrekkhat cu anmai tuah thei lomi, an neih thei lomi an duhnak ruangah duhkim ti nei loin an nitin nun an hmang liam. Aw, lei tlun nun hi zo in a hmang fuh bik ding! Aw, Lal pian campha hi zo in a hmang fuh bik ding!Aw, Aw, zoi khrismass hla sak mi hi Jesu in ngainuam a ti bik pei? Aw, zoi nauthar lawmnak lawman cu Pa Pathian in a co hlang bik pei? Aw, zo pawl Khrismass puai ah Jesu cu Thlarau in a leng ve pei! Leitlun ah phurrit a nei tu pawl, leitlun ah riahsiatnak a nei tu pawl, leitlun nunah duhthusam a hlawhtling hrihlo tu pawl, leitlun ah rilrawng ti hal pawl, leitlunah mi ih nekcep a tuar tu pawl, leitlun nunah mai milia canpual a hloh pawl, leitlun ah dodal a tuar tu pawl, leitlunah mi dang huat a tong tu pawl, leitlun ah tlaksam mi a nei tu pawl, ziang hmuahhmuah nei tu Lal pian campha ah Khrih ih thlarau cu na sungah ra luh aw sehla ziangkim hmuahhmuah ih bulhram Khrih cun ziangtik hmanah a diriam dah lo mi na thinlung cu a lo diriam ter ding asi. Milai thinlung cu nelrawn ramcar vek asi, tidai tawih khal le a ciap dah lo mi nelrawn ramcar vek asi. Asina’n nelrawn ramcar ah thingrah thatha a rah thei dingmi thingkung an cing duh tikah vunnel hnuaiah tidai in a pawh thei lomi tipuan an phah hnu ahcun tidai an tawih tikah nelrawn ram cu tidai a ciap deldel ih an duhmi hramkung thinkung an cing tikah thingthei rah an duh mi mi ziangtik lai khalah an rah ter thei theu.Cuvek in, leitlun nun ro duahdo ko in thinlung diriamnak hawl rero tu pawl, thinlung ikfik fialfial in nitin nun a hmang tu pawl Khrih Thlarau cu na sunglam nun tawdap ah phah aw dingin hmun pe aw la na nitin nun cu cerhti kiangah phun mi thinkung vekin ziangtik lai khalah a hring ringring ding asi. Cerhti kiang ih phun mi thingkung cu thlisia a hrangih a hnge a kiak tikah siseh ni a sa rei tukih a hnah a ro tik khalah siseh misual pawlin a hnah le a kung an hau tik khalah siseh a rodah lomi a hram ihsin cerhno tha sinsin a suak theu ih rahthatha a rah sinsin theu asi. Asinan Khrih Thlarau cu na sunglamah cambang dingin na timtuah cia tulmi a um. Leitlun siangpahrang pa cu na inah a ra lo leng ding asile na in cu na thianfai dingih ek le rimsia pawl cu insung ihsin na thianfai ta theu asi lo maw? Na neih mi thuamhnaw lakah a thiangbik na hruh ih na hmaikhal fai zetin na phiah hnu ah a mawi thei bikin na cei aw theu asi lo maw? Cuvek in Khrih Jesu na sunglam nunah cambangin na nunramah khua luah dingin na duh asi ahcun na sunglam nunah a thruhnawm mi, iksiknak, huat awknak, hurnak, hrawthrawlnak, mi relsiatnak, mah le mah porh awknak, mi dodal duhnak, lamtang tuah nak, midang lakah huat awknak thu sia tuah duhnak, rem awk lonak, mai hmaikhua sialnak, midang lungawinak laksak tahratin mah le mah diriam awk ternak, tvp pawl Khrih Thlarau thawn a um tlang thei lomi a thurhnawm pawl kha na lungsung ihsin na thianfai a tul asi. Cu pawl cu nangmah te na tuah thei lo ti khal Khrih in a lo thei. Na pianpi suahkeh mizia tha lo siseh na nitin nunihsin na thanhnem mi na thluak bu sungah a erh aw mi thinlung sia va, le riahsiat nak pawl siseh Khrih in a lo bawm thei ih a lo thianhlim sak thei asi. Asinan na sungah Thlarau in hna tuan dingin na tuah thei mi sung ah nangmah in na tuah a tul asi. Na sungah Khrih ih thlarau a cambang ih na thuaruahnak na sunglam nun tawdap ah a to hmiarhmiar asi ahcun na nitin nunah ziangtik hmanah a diriam dah lomi na nisa nun di a lo riamter ding asi. Na theih lo mi khal tihding a um nawn lo, mi tha lo pawl, mi hrawkhrawl le na siatnak tuah duh tu pawl khal tihding le huphurh ding an um nawn lo, farah le zawizaih khal tihding a um nawn lo, dunglam thuanthu tha lo sal ah a lo tang ter tu khal a lo theihhngilh ter thei, na hmailam nun hrangah na khawruah har hmuahhmuah khal a lo haihkiang sak thei, na nitin nunah na famkim lo ih na kiangkap milai pawlin an lo ningzet hman siseh la Khrih cun a lo tuah tha thei asi. A lo tuah siat tu pawl, na parah siatnak a tuah tu pawl, na duhmi tuah pitling thei lo dingin lamzin a lo kawm tum ringring tu pawl, a lo iksik tu pawl, a lo siahsuat duh tu pawl khal an um asile hi hi thei ringring aw, “TIntehrek te tia hman na hrangah thiltha an lo laksak thei lo ih an tuah mi an thei aw lo, na hrangahthiltha lo an tuah mi a umsun cu an mah le anmah an siat suah aw rero mi asi. Cutikah na duhdawt zetmi pawl anmah le an mah an tilzang an cum aw rero na hmuh titkah na zang an fak sawn ding asi.” ZUmnak nung thei dingin “Zumnak” Pathian laksawng “Jesu Khrih” cu na sungah a nun, a cen, a cambang, khua a luah a tul asi. Cutikah na kiangkap ah mi in Khrismass tiah an sim na theih tikah na sunglam ihsin a suakmi lungawinak, Khrih ih lungawinak cun nan nun pumhlum a lo ciah dingih lenglam Santa rawng sen le eng mawimawi, voksa le arsa le hla mawimawi pawl ah si loin na lungawinak cu na sunglam nun hramah a phah aw mi Khrih lungawinak ihsin a luangliam mi lungawinak asi ding. Khrismass lungawinak cu Lal pian camphai lawm tu zate hnen ah siseh Lal pian campha lawm tu pawl hrangah thilta a tuah tu pawl hmuahhmuah hnenah hmun camcin hram she!