Thihnak!

THIHNAK

July 24, 2007
Thihnak cu a mit a caw, mino, upa, pitar, putar ti um lo, A rat zik tikah mi a simcia lo, dunglam maw hmailam in a ra ti khal theihtheih asi fawn lo, Ziangtin a ra ding tikhal simcia theih asilo, ral, boruak thalo, natnak, siat tonak, tvp, cu a hmanrua ansi, Ka man hrih lo ti ah kham theih khal si hlah, zangfahnak le zawnruahnak khal a nei lo, Thihnak cu a puar, a hngal, ningzah khal a nei lo, a duh cancan ah a duhduh parah a thleng. Milai thinlungin ton a hreh bik mi cu thihnak asi, tihcing in milai parah nitin a thleng ringring, Milai mithli hi thihnak ih rawl thaw bik a bang, milai lungkuai ter hi a nuam awk zawng a bang, Milai pawl zuntuar in an tap rero laiah thihnak cun midang nunnak hawlin a vak rero thotho, Milai nunnak laksak tu dingah sersiammi bangin pakhat hnu pakhat milai nunnak cu a laksak vivo, Nikhatkhat ah zovek milai khalin amah (thihnak) thawn cibai aw lai ding an si theh ti a thei. Thihnak hi milai tongkam in biak theih sisehla, “ka duhdawtmi nunnak la loin keimai nunnak la sawn aw” an ti cio ding nan, mi aa vek tla a bang, a duhduh nunnak a laksak ih milai lung a kuaiter, Aw, ziangahsaw milai hmuahhmuah ttangtlang in thihnak cu an do lo, an neh thei lo mawsi, Aw, milai fimnak hin thihnak cu a siatsuah thei lo maw si, milai le milai an siatsuah aw aw, Lal le lal an that aw aw, khawpi le innpi cim ko an do aw nan thihnak cu zo hman in an neh thei lo. Thihnak cun thleidan a nei lo, milian mi farah, mi aa mi fim, mi tha mi tha lo tla a thleidang cuanglo, Mi lungawi zet lai tla a tap ter ih mi thinhar le rethei zet pawl tla a hrial cuang lo, Thihnak cu a sualzetmi lal vek asi, mi fanu le fapa thatha tla a laksak ih mittli thawn insang cu a tanta, Ziangtikah thihnak cu a tawp dingih milai in nehnak thuthangtha an sim ding, thihnak tihding a um nawn lo tiah zoin thu a sim ding? Asinan, thihnak nehtheinak lamzin pakhat a um, thihnak cu siatsuah si loin a thiltitheinak tawpter asi, Thihnak ih tumtah mi cu milai nunnak tawpter asi, asinan thihnak nehtu hrang ahcun thihnak cu nunthar hramthawhnak asisawn, thihnak ih tumtahmi cu milai lungawinak tawpter asi, asinan thihnak nehtu hrang ahcun thihnak cu lungawinakthar hram thawhnak asi. Thihnak in cucu a theih lo, milai cu ka neh sihmang a ti ringring, a ti kel ten milai nunnak a laksak rero, asinan a thiltitheinak cu neh in a um zo.Zesu Khrih ah a nungtu hmuahhmuah hrangah Thihnak cu neh in a um zo, thih cu kumkhua nun hramthawknak asi, thihnak cu leitlun nun tlansan in kumkhua tihal rilrawng um lonak ramah nun hram thawhnak asi, tihphannak a um lo nak ramah nun hram thawnka asi, milai kumkhua sankhuk nun hram thawhnak a rak si sawn. Aw, thihnak, na thiltitheinak cu neh in a um zo ih milai nuntawp ter na tumtah mi cu a kumkhua a cem thei lo mi nun hram thawhnak asi sawn, milai lungawinak tawpter na tum mi cu a kumkhua a tawp thei lo mi lungawinak nun hram thawhnak asi sawn. Mi zokhal, Khrih Zesu ah a nung tu pawl hrang ahcun Thihnak cu hreh rero ding asi nawn lo, tisa in a na le tuar theih lo asi laiah, thlarau in Zesu Khrih ah a nungtu hrang ahcun thihnak cu a feh hmaisa tu hrangah van sangka onsaknak asi sawn. Kan ni le can a thleng tikah vanramah mikhual si nawn loin inrak hmuaktu ding, kan duhdawtmi an feh hmaisa asisawn. Thihnak in lung a kuaiter mi zate’n, Khrih Zesu ah nehnak, thihnak cu kan hrangah neh in a um zo timi thuthangtha thawn Thlarau Thianghlim in lo hnem hram she! Thihnak lenglam ram, kan kumkhua sankhuk ram kan thlen tikah thihnak cu a hmin hman kan thei nawn lo ding, thihnak cun kan lung in kuai ter nawn lo ding, thihnak cun kan mitthli in tla ter nawn lo ding, thihnak cun kan lungawinak in laksak nawn lo ding, cutik ni ahcun, thihnak hnenah lungawithu kan sim sawn ding, “Aw, thihnak, a kumkhua ka umnak ding hmun thleng dingin sangka inrak onsak tu na si” kan ti dingih leitlun ram cu kan ngai nawn lo ding. Ziangkim cu lungawinak lawng asi dingih ruahsanmi a tlamtling lo a um dah lo ding, lungawinak siatsuah tu zianghman a um nawn lo ding. Cui hmun ahcun lungawi in nitin kutza kan beng ding asi! Cui hmun le ram thleng dingin ruahsannak cun thinlung a kuaimi zate’n lo hnem hram she! Pathian Thlarau Thianghlim in mangbangza in nan thinlung lo hnem hram seh, thihnak in a lo laksak mi nan lungawinak hmuahhmuah ih let zakhat in Pa Pathian in lungawinak lo pe hram seh! Tuarpinak thawn,