Zesu Hnen Ihsin Hotu Pawl Ziring Thil Pathum

Zesu Hnen Ihsin Hotu pawl Zirding Thil Pathum

Zesu’i mi kaihhruaidan ihsin Laimi khrihfa hruaitu pawl zir tha zet thil pathum:

1) Dodal tu pawl parah thinlungput (Attitude toward opponents)
2) Sinak vek pawmsak awknak (recognization)
3) Tongkam humhual

1) Dodal tu pawl parah thinlungput:

Lal Zesu in “ Nan lak ihsin pakhat in in zuar ding” a ti tikah “keimah ka si maw, keimah ka si maw” tiah a dungtlun tu pawl thinphang le mangbang in an sut aw celcel. Cumi ihsin ziang zir ding kan nei? Zesu in a mah zuar tu ding, that tu ding tiah a thei keukeu cia mi, Judas kha a dungthlun tu dang pawl hnenah a relse dah lo, a mitsen hmanin a met dah lo, a thleidang dah lo, ih huatnak mithmai thawn ziangtik hmanah a dungtluntu dang pawl mithmuh le hna theih ah a relsia in a met dah lo. Kawhhran hruaitu lole pastor ka si ti si, mai hnatuanpi, mai member, asilole Pathian pakhat a rian zumtu midang pakhatkhat dodal le rel se rero tu cun Zesu’I hmaiah zianghman thu sirhsan a nei lo, ‘va va tum’ bak lo cu. Mi pakhatkhat ih pacannak (pitlinnak) tahfung thabik pakhat cu a ngaih lomi, a mah dodal tu, anmah hua tu maw a huatmi pawl parah a tuahnak (tongkam) hi asi.
(Ka rual, nangmah a lo that tu ding tiah na theih cia keukeu mi pa/nu thawn hni suamso ten rawl ei tlang le ti in tlangin niziat thlaziat kumziat na um thei ve ding? Nikhat hman na um thei lo asile Zesu hnen ihsin zir ding tampi na nei lai).

2) Sinak vek pawmsak awknak (recognization)

Zesu in a dungtlun tu pawl kha an hmin in pakhat hnu pakhat a ko tikah Judas khal kha a hmin in a ko ve ih a pom, a dungtluntu pakhat vekin a zoh. Hmailamah ziangvek a tuah ding khal va siseh la a dung a thlun sung poh cu Zesu in thleidannak sete hman nei loin Judas khal kha amai dungtlun vekin a zoh ih a kaihruai, culawng hman si loin rinsannak, upatnak pek in sum kiltu tiangah a rak hmang. Judas in hmailamah a tuah lai ding mi (Zesu a zuar dingmi) ruang ah Zesu in Judas parah a tuah dingmi zianghman a thulh cuang lo. Ziang zir ding kan nei? Zesu in amah a duhdawt tu le amah thah tu ding hman an zate’n a dung an thlun lai ah zianghman thleidan nak nei lo ten rualran te’n a zoh hai ih a kaihruai, thu a zirh hai.

Pastor, kawhran upa, khrifa hruaitu pawl, thu pakhatkhat puhmawh in mai pastor tuanpi, kawhhran upa pi, zumtu pakhatkhat siseh kawhhran dang milesa siseh thleidan nak thawn, rinhleh awknak thawn, huphurh awknak thawn pakhat le pakhat zumtu vekin a pehtlai aw thei lo, pakhat le pakhat sinak vekin a pawm sak aw thei lo mi pawl in Zesu hmaiah zianghman thu zep le puhmawh ding an nei lo, ‘vava tum’ bak lo cu. Zumtu pakhatkhat in mah duhtu (maikawhhran misa) duhsak ciamco tahratin mah duh lo tu lole mah duh lo tu tiah rinhelh mi, mah kawhhran lenglam misa pohpoh parah thleidannak a neih asi ahcun Zesu hmaiah zianghman puhmawh ding a nei lo.

Mi pakhatkhat a aa maw a fim ti tahfung thazet pakhat cu a kiangkap um pawl lakah ziangvek tohkham ah to in ziangvek tongkam ka tlak ding ti a theih le theih lo hi asi.


4) Tongkam/thuneihnak humhual
A dungtluntu pawlin Zesu hnenah zo si a kut vorh le kehlamah to ding ti thu an sut tikah Zesu in cucu apai thuthu asi thu asim hai, keimai thu asilo ati hai. Ziang zir ding kan nei? Zirhtu le mi hmaiah thu simtu pawl hin thufiang kelkel asi ti theih fiang lomi parah le Pathian thawkkhum mi Thuthianghlim in “na sim thei” tiah thu a pek lo mi pawl, fiang lo zet thu pawl kha thei zet vekin an sim tikah an theih lo mi sual tumpi an tuah asi. “Ka thei lo” “cucu ka thuneihnak lenglam thu asi” ti hi ningzah ding asilo. Zesu khal kha a ning a zak lo. Curuangah mi zokhal in ka theih lo mi ziang a um ti thei tahrat loin mai theih dan, mai kawhhran doctrine lawng vu vanram kainak ding lamzin vekah ruat in mi dang hmuahhmuah cu a nam thlak tikah siseh sualnak cikhat tuahtu pakhat cu setan fa vekin a nam thlak ih amai sualnak cu thianghlim zetin a sim tikah siseh a theih lo mi thilsual tumpi a tuah asi. Thlarau porh awknak (spiritual pride) hi sualnak hmuahhmuah lakah a tum bik mawsi ti ding khawpin a tih nung ngaingai mi asi. Curuangah Zesu hnen ihsin hruaitu pawl zir ding pakhat cu “leitlun ah a ummi milai theihthei mi thu hmuahhmuah lakah ka theih mi le ka damsungah hawl rero hman ningla ka theih thei mi cu malte asi ih ka theih lo mi thu a tam sawn.

Curuangah ‘ka thei lo’ ti cu ningzah ding zianghman a um lo. Cui hleiah ka parah thuneihnak cu maltakte a tul mi tuahnak ding lawng pek ka si ih ka tuah thei mi le ka theih fiang mi sung lawngah raltha zetin sim le au ding ka si” ti hi mi zapi thuhram sirhsan si cio hram sehla. Ka theih lo mi thu tampi cu tuanvo neitu pawl hnenah theihter mi a um asi ti khal pawm thei a thupi. Leitlun politicians pawl cun an thusimmi ngaitu pawl thinlung diriam ter dingin an tuah thei lo ding mi le an tuah lo dingmi hman mi thu an kam in an sim ciamco theu, thei deuh le thilthithei deuh si an zuam aw ciamco theu. Zesu cun a dungthlun tu pawl hnenah cuvek cu a zirh mi asi lo.

Mi pakhatkhat a theih lo mi ziang a um ti thei loin mai thuneihnak le thutheih mi lenglamah raltha zetin a au rero tu cu mah le mah hmur buangbar ter menmen tu asi.

Hotu pakhatkhat in a tuah thei lole tuah lo dingmi a dungtluntu pawl hnenah thu a kam tikah a dungtlun tu pawl ih rinsannak le upatnak cu a ka nalah luangliam ter men tu asi.

Lunch time meditation sung ihsin thutawi ka rak lo hlawm hai mi asi.

Lungawi,