Ngaidamnak!

NGAIDAMNAK
May 11, 2007
Nupinu thinheng tukin “Bawi Jesu in a ngaidam khal asile kei cun ka ngaidam thei lo ding” ati mi ka thei dah. Zumtu tampi hi cuvek kan si theu. Bawi Zesui thupek hmuahhmuah lakah “Ngaidamnak thupek” hi thlun har bik pakhat asi ticu thlarau nunpitling nei tu hmuahhmuah in an thei cio ding. Lai pacangtha tongkam cun „Pawpi in a neh a thihpi ih pacangtha cun a tong/thu a thihpi“ ti a rak si nan Ngaidamnak cun cui pacangtha thuken/tongkam khal pahtlang tul can mi a thlenpi theu. Ziangah tile milai thuken (principle) hnakin Pathian in milai a duhdawt sawn. Cuticun Khrih dung a thlun tu hmuahhmuah cun Khrih in a duhdawtmi hmuahhmuah duhdawt thei a tul fawn. Pathian fale pakhat cu hua tahrat in Pathian ka duhdawt asi timi cu mah le mah bum awknak men asi fawn. Pathian fa pakhatkhat thangsiat reronak hmurka cun Pathian a tilungawi thei fawn lo. Ngaidamnak cu thlarau ah pitling nun nei thei dingin le Khrih mizia tangdawrnak nun nei thei dingin thlarau in zumtu pakhat a tuahsernak hmanrua pakhat asi.

Pathian in misual a ngaidamnak zoh hnik uhsi! Amai mizia kalh le thuken kalh in a nuncang mi, a tluse zomi milai cu Pathian in ziangtin a ngai dam thei? Milai mizia le nuncan ziaza, tuahnak pawl cu Pathian fihzawng le tenumza a rak si fawn. Ziangtin cuvek mizia a nei mi milai cu Pathian in “ka fa” ti ah a ko thei? An sual a ngaidam hai maw si? Asile a thianghlim mi Pathian cun ziangtin amai mizia thawn a kalh aw mi milai cu a ttang sungah a pawm thei? A bawrhhlawh mi pawl cu ziangtin a thianghlim mi thawn an um tlang thei?

Pathian in sual hi a ngaidam lo, misual a ngaidam mi asi. Misual pawl sualman cu Bawi Zesu in khross parah a peksak sawn asi. Sualnak hmuahhmuah ih man cu Khross parah pek asizo sawn asi. Khrih sungah misual cu ngaidam asi sawn. Cuticun misual cu Khrih zumnak thawng in Khrih sungah tithianhlim in a um sawn asi, mithianghlim ah pom asi sawn. Mi zokhal, Khrih sungah a um lawnglawngah a sualman pawl cu ngaidam, man peksak asi zo ih midang mawhnak khal a ngaidam thei asi. Cutin asile Pathian in sual cu a ngaidam si loin misual pawl cu a ngaidam ih an sualman cu a peksak sawn asi, sual cu a hua ringring a ngaidam dah lo.

Pathian in Khrih sungah milai pakhat a sersiamthar ih amah thawn um tlang thei dingin a tithianter tikah “ngaidamnak thupek” hi thlarau hmanrua pakhat asi. Zokhal amai unau (khristianpi) mawhnak a ngaidam lo tu cu Pa in a sual a ngaidam ve lo ding. Ngaidamnak ih umzia cu, tongdang in kan sim asile, kan milai/tisa mizia in a tuar thei lo mi, milai zawiawi theinak in a tlin nawn lo khawp in kan parah kan duh lo zawng tuah tu, kan duhzawng a siatsuahtu, kan lungawi zawng a siatsuahtu pawl parah an tuah vekin siatnak thawn thungrul sal loin le Khrih ah unau vekin duhdawt ringring theinak asi. Cucu thlarau in a luahkhat mi pawl nun lawngah a cang thei mi asi.

Ngaidamnak thu thawn peh aw in cinken tul mi hrekhat pawl:
#. Ngaidamnak cu “sual pomsak” asi lo.
#. Ngaidamnak cu sualnak theihhngilh sak asilo.
#. Ngaidamnak cu Pathian in a ngaidam thei mi pohpoh ngaidam asi.
# Ngaidamnak cu Pathian in a duhdawt thei mi pohpoh duhdawt asi.
#. Ngaidamnak cu “duhdawtnak thupek” thlun le thlun lo hniksaknak hmanrua asi.
#. Ngaidamnak cu mai tisa mizia kalh in nun asi.
# Ngaidamnak cu tisa mizia kang-alh ter tu thlarau hmanrua, meisa asi.
#. Ngaidamnak cu thlarau in zumtu nunah a rahsuakter mi asi.
#. Ngaidamnak cu zumtu pakhat in Pathian thupek maw amai duhnak a ngai pawimawh sawn ti hniksaknak asi
#. Ngaidamnak cu thlarau ah mi pitling si thei dingin karkaan hrimrhim dingmi karbak asi
#. Ngaidamnak cu thlarau lam pa si thei dingin thinlung timtuah nak asi.
#Ngaidamnak nun cu milai tisa porh awknak lenglam thlarau nuntu mizia asi.
#Ngaidamnak cu milai porh awknak tthiatbal tu thlarau hmanrua, meisa asi.
#Ngaidamnak cu kan duhlo zawng a tuah tu pawl parah siatnak tuah thei mi tuah loin sup awknak asi.
#Ngaidamnak cu Khrih hminin midang duhnak sawn kha thupi sawnah retih pomsak asi.
# Ngaidamnak cun mai hmakhua a sial lo.
#Ngaidamnak cu Pathian duhnakle remruat ah hngat awknak asi
# Ngaidamnak timi cu milai zawiawi theinak lenglam ah duhdawtnak ih rah asi.

Zumtu mi tampi in Pathian thupek „Ngaidamnak thupek“ kan thlun thei lo ruangah kawhhran tampi a kekkuai, zumtu tampi thenthek awknak a suak, nulepa thenthek awknak a suak, unau sungkhat thenthek awknak a suak, rualpitha thenthek awknak le thinlung kekkuai ko duhdawtmi le duhdawttu pawl thentheknak a suak. Asinan, khatlamah, „ngaidamnak“ nun nei ding khalin porh awknak in a luahkhat mi milai thinlung rikham cu ttthiatbal a tul asi. Ziangah tile ngaidamnak nun cu milai tisa thinlung kalh zawngih nun asi. Milai tisa porh awknak lenglam nun asi.

Mi zo khal khrih hmin in a unau pakhatkhat mawhnak a ngaidam tikah a unau pai mawhnak ruangah a hloh phah mi hminthatnak, sunlawihnak, sumpai, lungawinak, canpualtha hmuahhmuah cu amah Pathian in a letza in a rul sal theu sawn asi. Cutin ngaidamnak cu thlarau pitling nun nei thei dingin hmanrua lawng si loin midang mawhnak ruangah kan hloh phah mi lungawinak pawl khal Pathian hnen ihsin kan ngah sal theinak dingin thlarau lamzin pakhat asi. Mi zokhal a unau mawhnak a ngaidam lotu cu a unau pai mawhnak ruangah a hloh phah mi thil (canpualtha, hlawknak) cu a hmusal nawn lo ding hlei ah amai lungawinak a hloh phah ding asi.

Asile, zumtu pawlin ziangvek sualnak, mawhnak le thilthalo tuahnak pawl kan ngaidam thei ding?
Sualnak, thilthalo, diklonak, le sual hmuahhmuah cu ngaidam ding kan si lo! Cupawl a tuahtu zumtu unau pawl cu ngaidam ding kan si sawn. Sualnak kan pomremsak asile kamah cu sual lamtang kan si. Cui sualman mawhsiatnak kan parah a thleng ve ding asi. Nupi nu pakhat cun a fale in ruk an ruk tikah a fale a duhdawt tuk ruangah “Kafa, na rukruk mi cu ka lo ngaidam asi” a ti ih rukruk that lo zia cu a simlo, a do lo asi ahcun a fale pawl rukru dingin tha a pek sawn asi ih sual tumpi a tuah asi. Curuangah zumtu pawlin Khrih dungthluntu dinhmunah dingin tuanvo, mawhphurh, tuah ding kan neih mi cu “sualnak, diklonak, sual citintian do” asi. Misual do ding si loin sualnak sawn cu do ding asi.

Mimal, kawhhran, mibur, kumpi, milai pawlkom awknak, political party, cozah khalin mipi nekcep in, mipi/mimal canpual siatsuah tahrat in, mipi/mimal le mifarah lungawinak siatsuah tahratin, diknak le dingnak um loin, thil an tuah mi hmuahhmuah cu raltha zetin zumtu, Khrih dungthlun tu pawl cun do ding tuanvo kan nei. Raltha zetin thutak thudik ausuahpi ding kan sisawn. Cutin titikah atthlak zetin thahrum hmangin cangvai ding tinak si loin diknak le dingnak thuken thawn raltha zetin ding ngam ding sawn kan si.

Mi tampi cu an theihlo cingin sualnak tipungtu, sual tantu, dinpitu an rak si theu. An duhdawtmi le rinsanmi pakhatkhat ih sualnak cu an thuhsak, an humsak, an tanpi, dinpi tikah sualnak tipungtu, sual lamtang an si ti an thei aw lo theu. Mi pakhatkhat, mibur pakhatkhat, pawlkom, kumpi le cozah khalin thuthluknak dik lo, Pathian- thu dik le dingnak kawlhzawng thuthluknak an tuah theinak ding tansan, hmanrua le bawmtu ah kan tang asi ahcun sual tipungtu, dinpi tu kan si tinak asi. AN thuthluknak le tuahnak ih arah suah mi sualman liamkuan cu kan parah a thleng ve ding asi. Curuangah zumtu mi pitling pawl cun sualnak dinpi tu si loin sual cu do in misual duhdawttu le ngaidam tu si thei a tul. Kawhhran, vengsung mipi a hrisel/damcak theinak ding khalah zumtu zapi, pastors le kawhhran upa pawl tangrualin sual cu do, vuakthlak ringring thei a tul. Sualnak dinpi, tanpi, le thuhruknak hi kawhhran siatsuahnak ding hrangah santan hmanrua thabik pakhat asi.

Zumtu zapi ten, Khrih in a ngaidam thei mi le duhdawt thei mi pohpoh cu ngaidam le duhdaw ding kan si. Curualrual in a do mi pohpoh cu do ding kan si dawn. Khrih in a huat le tenzetmi sualnak hmuahhmuah cu tanpi le dinpi, thuptu si sawn loin dingnak le diknak dinpi le ausuahpi tu sawn ding kan si. Ngaidam tu cu ngaidam mi hnakin a pitling sawn ih sual a dinpi, thuptu cu sual tipungtu an si. Dingnak le diknak na dinpi laiah nangmah te um vekin ziangtik hmanah ruat aw dah hlah aw, vancungmi siar cawk lo na dunglamah an ding ringring. Khatlamah dingnak le dik lonak lamzin na zawh lai ah leitlun rualpi siar cawk lo nei vekin an thei aw aw khal asile mitcaw rual lamzin zawh vek fang an si ti theih a tha. Ziangah tile dingnak le diknak tel lo sakhua biaknak le roralnak hmuahhmuah cu Pathian in a ten tuk mi thil, rei daih lo ding asi.

Kan ram le miphun thansohnak ding hrangah kawhhran a dam thei nak ding hrangah ram le miphun hruaitu, vengsung upa, kawhhran upa le pastors pawl, zumtu mimal zapi te in ziangkim kan tuah nakah le thuthluknak kan neihnak tinkimah dingnak le diknak thuhram ah hngat aw aw in kan unau pawl mawhnak le tuahsual pang mi pawl cu ngaidam aw tawn in sual kan do tlang lawnglawng ah Pathian in a cohlan tlakmi biaknak le rorelnak cu kan nei thei ding asi.

Pathian in thlarau nunpitling nei thei dingin lam lo hruai cio hram seh!

Duhdawtnak in,