Wednesday, August 22, 2007

Zalennak (Mimal nun)

“Zalennak”
“Thutak na thei dingih thutakin a lo luatter ding”

Sal tang mi pakhat hnenah “zalennak” hnakin duhmi le ngai pawimawh mi ziang na nei maw ti ah sut sehla a sannak ding theihcia asi. Asinan ‘sal’ ah ka taang ti a thei aw lo tu pawl hrang ahcun zalennak thu sim rero cu umzia nei lo vek asi fawn ding, khatlamah. Zalennak thu sim tikah “mimal zalennak” le “mibur zalennak’ ‘thlaraulam zalennak’ ‘ram mipi zalennek’ tivek tongkam pawl hin mitampi thinlung a luah bik dingin a lang. Rampi zalennak thu siloin mimal milai pakhat zalennak thu ruattlang hnik uhsi. “Zalennak” thu theifiang dingin le a zalenmi vekin nung thei dingah ziangvek thil pawlin mimal cu a kai-hremih ‘sal’ ah a canter timi zoh hmaisa hnik uhsi. Zalennak hi pawnlang ttawntem tu hnakin thinlunglam sawnah a tthum aw mi asi. A tlangpi thu in milai hi “duhmi” le “duhlomi” pawlin salah a canter theu. Hi pawl hi fiang deuh in sim hnik uhsi.

Zalennak tongkam ih sullam cu kai-hrem tu um loin tuah duh mimi tuah theinak, duh lomi pohpoh hrial theinak kan ti asile a tawizawngin a lailang zet ding. Cutin asile mi pakhatih zalennak cu ziang a duh ih ziang a duh lo timi parah a thum aw kan ti thei dingin a lang. Cun khatlamah “sal” timi tongkam kan sim fiang tum asile “Mai milai duh thlannak ruangah si loin, a salpu-neitu ih duhmi sawn kha tuah ringringtu, midang (sal-pu) rian dingin a nungtu ti in simtheih asi.

Sim duh mi sawn cu ‘tisa’ le ‘thinlung’ sal ihsin zalennak sawn asi. Milai pakhat cu ‘taksa’ ‘thinlung’ le thlarau’ kawmkhawm mi asivekin ‘thlarau-keimah’ hi lal sawn loin mi tampi cu ‘tisa’ le ‘thinlung’ sal sungah an tangih saltang ka si ti khal an thei aw lo theu. Mi hrekhat cu ‘taksa’ salah an tangih an ‘thlarau-keimah’ cu an taksa parah a hngat awk ruangah an ‘taksa’ in a tlin tawk tiang lawng an damsungah tuah thei dingin an ruat aw theu. Cutin an suangtuahnak le thuruahmi hmuahhmuah khal an taksa dinhmun parah a hngat aw theh theu.Cun mi hrekhat lala cu anmai ‘thinlung’ salah an tangih an lungawi le riahsiat ih zirin an nun cu a nuam nuamlo, a tamtling tlinglo, a famkim kimlo tiah an ruat aw theu. Cuvek ngaingai in an damsung an tawn mi khal an thinlungin a ruahban cin le hmuhban cin par lawngah an hngat aw ih an thinlung diriamnakah an nitin nun cu a hngat aw ringring. Cutikah thinlung cu a hmun dah lo mi, a thleng aw ringring mi, mibum hmang (Bible in a simvekin) asi tikah an nunkhua khal a thleng aw ringring, an lungawinak khal a thleng aw ringring, a hmun dah lo. Acancan ah an thinlungin anmah a pum riangri theu. Milai pakhat cu amah le amah ziang ka si tiah a ruat awk vekin asinak cu asi si loin a thinlung sungah a ruahmi, a thinlung sungah khua a luahtu vekin a hma khua cu a cang sawm mi asi.

Cun milai ‘tisa’ le ‘thinlung’ cu neh tahratin a ‘thlarau-keimah’ parah hngat aw tu hrang achun a ‘tisa’ le ‘thinlung’ in a duh lo zawng a ton tik khalah a ‘thlarau-keimah’ timi cu a hmun ringringih a damsungah a tuah duh mi le tummi pawl khal tuah suak thei dingin ziangtik hmanah a zumnak a thlahtlam dah lo. A mai sinak le a hmakhua a ruat tikah ziang tik hmanah amai ‘tisa’ le ‘thinlung’ parah a thum aw dah lo ih a sungmuril nun ahcun ziangtik lai khalah a hmun ringring mi lamzin zawh in hmai a nawr sinsin thei asi. Pathian zumtu pawl an sile an sungmuril, milai thlarau (siathaheihnak) cu Pathian Thlarau thawn a pehtlai ringring tikah ziangtik lai khalah an nun cu Pathian thawn a peh tlai ringring mi, Bible in “Enock cu Pathian thawn an feh tlang ringring” ati vekin an damdung can an hmang.

Taksa sal sungah a tangtu thu thawn malte sim bet sehla, laimi pawl ruahnakah “keimah” kan ti tikah kan taksa ruangpi kan kawk theu. Cutikah ruangrai tha, cakvak, zoh mawi cu an rak zum aw zet theu. Cule taksa ruangpi in a tlin tawk vial tuah thei dingin an ruat aw theu, cuvek milai pawl cu taksa ruangpi in a neh mi milai an si. A taksa a ttawl, a thau, a ril a rawng a pum a puar, a dam damlo, a mawi a sia timi parah an thinlung hmuahhmuah khal a hngat aw ih taksa ruangpi dinhmun parah an hmailam khal a hngat aw ti ah sim theih asi. American president 32nd nak, Franklin D. Rooservelt kha cuvek milai rak si sehla American president a tuan thei lo lawng si loin a insang hman thaten a kilkhawi in a cawm thei lo ding. Franklin Rooservelt kha kum 39 a kim kum, 1921 ah poliomyelitis timi natnak in a tlakih a ke pahnih in a baita, taksa kim lo ah a cang. Asinan anih cun “Kan ttih ding mi umsun cu ‘ttinak’ lawng hi asi” ti ah ruatin a rak nung. Franklin D Rooservelt ih “thlarau-keimah” cu ‘thinglung’ le ‘taksa’ parah hngat aw mi asilo.
Cutin a “thlarau-keimah” cu ‘thinlung’ le ‘tisa’ sal ihsin a luat mi asi ih a tumtah, lungawi le riahsiatnak cu tisa cahnak le thinlung phurnak parah a tthum aw lo ruangah American rampi in harsatnak maktak an tawn lai fangah president tiang a tuan thei. President a ttuan thawk tikah American misa million 13 hnatuan nei loin ramsung ei-in hawlnak ah harsatnak an tawng. Leitlunah ralpi voihnihnak a thawkih Japan pawlin Pearl Harbor, American tikulh ralkap camp pi kha 7 December 1941 ah an kap . Cuvek harsatnak tikcu can laiah zianghman ttihnak nei loin ral a rak phuang ih Amrican mipi le leitlun ram tampi kha tohkham leng par ihsin a rak kai hruai thei asi. (A ke pahnih a that lo ruangah tohkham leng parah a to ringring mi asi). Cui hleiah American ramih hnatuan nei lo million 13 pawl kha thazang a pek hai ih pursum leilawnnak lamzin tha a hawlsak hai. Cucu mailai ‘tisa’ sal ihsin a luatmi pa ih thuanthu pakhat asi.

A pahnihnakah ‘thinlung’ salah a tangmi pawl thu tawiten’ simhnik uhsi. ‘Thinlung’ salah a tangtu pawl cu anmai thinlung in a uk, a kaihrem ih an thinlung diriamter ding cu thupi bik le an damsan asi sawn. Cutikah, thinlung ruahnak thalo le mi siatsuah thei thinlungput thinlung hiarhalnak, thinhengnak, mi huatnak, riahsiatnak, lungawilonak, thusia cinkennak, thlaphahnak, tihhrutnak, thinlung siatvatnak tvp. in an thinlung a luahkhat ruangah mi tampi cu thinlung salah an cang. AN nunnak pumpuhlum cu an thinlung in a uk vekin an nitin nun cu an thinlungin a kaihruai vekin an cangvai, an tong ih thil an tuah. Cui hlei ah asebik pakhat cu an dunglam thuanthu ih salah an cang; an dunglamah a cangmi in an hmakhua a siatsuat theh. An hmailam cu an dunglam hnakin a thimsawn vekin an hmu, rinhlehnak le ttihnak hlir in an khatih anmah le anmah khal an zum aw ngam lo vekin midang khal an zum ngam lo. An mit in an hmuh thei mi le an nitin nun in a tawn mi lawnglawngin an thinlung cu a luahkhat vekin an hmuh le ton mi ih salah an cang. Anmai thuanthu thalo le thinhengnak pawlin an thinlung a luahkhat ruangah midang par khalah thiltha an hmu thei lo. An hmailamah thiltha thleng ding cu an duh zet nan an thinlung cu thusia le thiltha lo le riahsiatnak lawnglawngin a luahkhat tikah an ruahnakin a neihter mi mithmai sia le a tongsuak termi tongkam tha lo pawl thawn an khat tikah an thinlung duhthusam an tuah suak thei lo lawng si loin kiangkap milai pawl hrang khalah zangfakza an silole hnaihnawkza ah an cang theu. Hmailamah thiltha hmu dingin duhthu a sam tu cun a thinlung sung cu thiltha in luahkhat ter seh, ti asi fawn. Mai milai thinlung sal ihsin a luatzo tu pawl cun an nitin nunah an thinlung cu kholhfai ringring hna an thiam ih a tlunah kan simmi siatsuah theitu thinlung khawruahnak hrimrhim an thinlung sungah an ret duhlo; a tha, a fim, le a hlawhtling dingmi, a thianghlimmi le an milai sinakah Pathian in amai hmuihmel kengin a tuahmi pawl sawn cu nitin cen in nunpi hna an thiam. Curuangah ziangkim an tuah tikah an thinlung, “thlarau-keimah”, le taksa zate tangrualin ziang lamzin an zawh tik khalah a hlawh tling bik khal an si ringring. An hnih tikah an hmurvun merkawi aw men lawng si loin an ‘thinlung’ ‘thlarau-keimah’ sinak thawn a milai sinak sungmuril ihsin an hni siamso ih a mawi hlei ce. An nun in huham a nei; Pathian in milai a sersiam tikah amai hmuihmel a ken termi kha an nunah hmuhtheih in a lang. ‘Thinlung’ saltang mi tampi pawlin milai thinlung luahkhat theu tu, huatnak, iksiknak, hngerteunak, thuanthusia cinkennak, ttihphannak, porh awknak, tvp pawl hi mi siatsuah thei tu tihnung tuk ‘tur’ asi ih cancer natnak pa-ngang in milai tisa a ei siat vekin milai sunglam mawinak hmuahhmuah siatsuahtu asi ti an thei lo. Mi hrekhat cun an thei nan an ‘thinlung’ salah an tang ruangah cu pawl cu an do neh thei lo. AN nitin nunah sal mithmai an keng ringringih an thinlung cu thimnak in a khat.

A netabikah, a nepbik sicuangloin, ‘thlarau-keimah’ zalennak thu sim hrih uhsi. Mi tampi cu Pathian zumtu khristian an ti aw ko nan anmai tuahthatnka, tuahsualnak, famkim lonak parah an hngat awk ringring tikah mah le mah mawhsiat aw ringringin an um. (Cuhnak hmanin midang tuahsiat tuahthatnak parah an lungawinak hngat aw tu pawl cu ziang tluk mi vanduai saw an si). Cuticun Jesu Khrih in a tuahsak zomi thlennak man cu an nunpi thei lo, an hrangah a thahnem lo. Asinan, Khrih ah zalennak a nei tu pawl cu anmai sualnak man hmuahhmuah cu Khrih thisen in a peksak zo ti an theifiangih an nitin nunah a famkim bik si thei an tum na cingin an tlin lo mile famkim lonak pawl ruangah ziangtik hmanah mah le mah mawhsiat aw in an um lo ih Khrih in a tuahsak mi parah nitin lungawinak in an khat sawn. An kiangkapah mi tlamtling lo le harsatnak nei an hmuh tik khalah anmah in an neih mi vek Khrih ih tlennak thisen sunglawi lungawinak cove dingin an duhsak ih ngaidamnak le zangfahnakin an khat. An ‘thlarau-keimah” hrimhrim cu ninghang le riahsia in an um dah lo ih lungawinak hlir in an khat. Cuticun an nitin nunah an kiangkap ah thilcang mi le an nitin nun in a tonmi parah an hngat aw lo ih Pathian in amai hmuihmel kengin a sersiammi, an milai sinak muril Pathian Thlarau thawn a pehzawm aw ringring mi ‘thlarau-keimah’ kaihruainak ah hngat aw aw le tuhlut aw aw in nitin an nungih lungawi siamso ten nitin nun khua an sa asi.

Himi casiarttu lakah “tisa’ le ‘thinlung’ salah a tangtu nan um asile luatnak a um asi. Zalennak ngah na duh asile lamzin a um asi. Tisa cah lonak ruangah nitin nunkhua beidawngin a ummi kan um maw? Thinlung siava neih ruangah mah le mah nitin leitlun hell ah a tang mi kan um maw? Thinhengnak, iksiknak, huatnak, tihnak, thinphannak, le leitlun thinlung hmanrua tha lo thawn hrem rero mi kan um maw? Kiangkap milai pawl tongkam le tuahnak ruangah riahsia rero kan um pang maw? Dunglamah a cang mi thuanthu in salah a tanter mi kan um maw? Dunglam thuanthu in hmailam nunkhua a siatsuahsak mi kan um maw? Zalennak pe thei tu a um asi. Dunglam thuanthu ttha lo sal sungah a tang mi kan um maw? Hmailam thuanthu ruatin khawruah har kan um maw? Zelennak pe thei tu a um asi. Na nitin nunah na hmuh tonmi, taksa in a ton mi le thinlung in a ruatmi, suangtuahnak pawl salah tang nawn loin Pathian in amai hmuihmel keng na ‘thlarau-keimah’ cu zalen zetin nunpi in na leitlun nun cu hmang thlang aw.

No comments: