Lai Mino pawl hnen thucah

Lai Mino pawl hnen thucah tawi!
Unau Pawl,
Ziangruangah Falam misa pawl hi national politics ah siseh Falam khawlipi ceimawinak le thansohnak lamah kan tlaniam tuk? Timi thusutnak hin mino ziangmawzat thinlung sungah hmun kauzet khua a luah asi ti ka hmuh tikah hmailam saupi hrangah ruahsan ding a um asi ti ah ka ruat sawn.
Falam misa pawl hi santhar san ( Burma independence) hnu lamah Laimi (chin) mi zate lak khalah hmaihruai tu le thinlung kau, zapi huap thei thinlung rak nei in kaihruai tu an rak si theu. Falam khawlipi khal mirang pawlin Chin mi zate khawlipi si dingin khua an rak khang. Asinan a tu ahcun kan khawlipi khal a tumsuk duahdo ih a sung-um misa pawl khal leitlun hmuntin le ramtin ah an tekdarh aw theh ih milai pawl khal ruahnak phunphun, hnampeng hranhran, khua le tlangah an then thek aw theh, thinlung hmu aw nawn loin a pingparang ah an thek darh aw theh. Cucu ziangtin tuah thatsal theih asi ding?
1988 hnu lamah Chin mi tlawngta pawl lak khalah mi rin-um le kaihruaitu lakah falam misa tlawngta pawl an rak si. Asinan a tu ahcu ramleng a ummi Falam misa pawl lakah rualrem ten pawlkom awknak, pehtlaih awknak, thuhmunkhat ten ram le miphun thu ah thinlung hlawm awknak, hmalak tlangnak a um thei nawn lo. Ramsung khalah biaknak hruaitu pawl hman an rem aw nawn lo. Miphun thansohnak ding hrang fimthiamnak le calai lamah hmalak tlang ding cu sim lo, an casuah mi tiang hman siar sak aw lo dingin ca an suah riangri, thu an than aw ciamco, anmai lam tang, an kawhhran pi pawl cun anmai casuah mi lawng siar hai sehla an duh ti thu tlang an au rero.
Ramleng kan zoh asile Falam misa pawl a burin an um khawmnak hmun kip poh ah lungrual zetin tuan tlang ding a malzet. Biaknak lam khalah thenthek awknak in hmun kau tuk khua a luah. Pakhat le pakhat relsiat awknak hlir in an khat. Mino le mino khal an rem aw lo. Upa le upa pawl khal an rem aw lo. Upa pawlin mino pawl khal lam hmuh hna an thiam nawn lo. Mino pawlin upa pawl khal upat le thlawp awk thiamnak an tlasam vivo. Pakhat le pakhat dodal awknak tongkam sia, rel siat awknak le eltai awknak tongkam sia pawlin mi tampi thinlung khua a luah in a lang. Hruaitu rak tuan dah tu pawl khalin dunglam tlaksiatnak ruangah "keimah hnakin midang in hruaitu tuan hai sehla thiltha sawn a suak thei sawn pei maw" ti ruahnak a um nawn lo. Zo khal lamtang hawlin a bur tete'n lungrual pi an tuah aw vivo. A hrekkhat in mai "hrin" tete an hawl aw aw. A hrekhat in mai rualpi hlun tete an hawl aw aw. A hrekhat in kawhhran pawl kom lung rualpi an hawl aw aw. A hrekkhat in nupi pasal sungkhat sinak le hrin le hram in an hawl aw aw ih a bur tete lamtang an tuah aw vivo. Cutikah a bur tete in mai hmakhua cio lam an sial ih mi bur tete in lungrualnak an nei. Cutikah senpi vangtlang hrangah ziang a tha, senpi vangtlang hrangah ziang vek le zovek milai in thiltha a tuah thei ding ih ziangvek hnatuantu hi kan mipi in an mamawh timi hnakin mai mibur lamtang tete lungawi zawng le phurzawng lungrualpi vial thurual awknak an tuah vivo. Cutikah anmai lamtang mibur lenglam milai zo poh khal a se thei bikin do le relsiat an tum theu. Cu pawl cu ziang ruangah asi? Bible in a simmi "If there is no vision, the people perished" a timi vek khi a si in a lang. Chin mi zapi kaihruai thei dingin, Chin miphun in a fehpi rero mi thuanthu tuah tha thei dingin, kawlram pumpi in a feh pi rero mi thuanthu tuah tha thei dingin, leitlun thuanthu in a fehpi rero mi thuanthu tuah tha thei dingin kan milesa in kekar rak thlak ve thei dingin ruahnak (vision) a um nawn lo. Falam misa pawl mit cu mai mibur, sungkhat, hrinpi, le lungrualpi pawl lamtang tuah aw mi mai lamtang diriam ter awknak fangin a khuh theh in a lang. Kanmah thawn a mil aw tawk fang hotu khal kan ngah dingih kanmah thawn a tlak aw fang thuanthu khal kan nei ding. Cucu zahpi rero khal a thahnem lo ih el theih khal asilo, kan sinak in a tlin tawk thuanthu nitin kan belh rero asi.
Cutikah ziangvek tongkam in mi tampi hnasung a hlehka rero ti asile; kum upa deuh pawlin anmah hnakin senpi vangtlang hrang thatnak tuah thei tu ding khal iksik nakin an khat, an mai tulefa le an lamtang misa ah an ruat lo mi pohpoh cu a se thei bikin namthlak duhnak thinlung an nei, senpi vangtlang hrangah ziangvek zo vek milai kan tungding in kan bawmbawi aw ding timi thinlung a hlo sinsin, mino lakah burkhat le burkhat an rel se aw rero theih ding a tam, mifim ti aw pawl khalin lamtang in an ruahmi lenglamah thatnak tuahtu an hmu thei nawn lo, khawhhran upa le zirhtu pawl khalin anmai kawhhran lenglam ah mifel le mitha khal an hmu thei nawn lo, upa pawl khalin tefa vangnau ziangtin kan tung ding thei ding timi ruahnak a hlo vivo, mino pawl khalin upa pawl parah upatnak a hlo vivo, nunau le nupinu pawl hmur khalah anmai khawhran hruaitu pawl le vengsung hruaitu pawl relsiatnak siseh mi thangso ding mino pawl relsiatnak tongkam sia in khua a luah theh. Hi pawl hi nan hmuh tikah zo hman mangbang hlah uhsi. Ziangah tile Falam misa ti aw pawl lakah miphun le rampi hrang ruahsannak (national vision) a hlo theh zo. Upa pakhatkhat in amah hnakin mino deuh a rel siat tikah, asilole a pacangpi a rel siat zawk rero tikah, mino pakhat in amah hnakih upa deuh pawl ziangtin upatnak ka pek dingin an dung ka thlun ding tihnakin an rel siat zawk rero tikah, nupinu hmurza deuh pawlin an kawhhran hruaitu a relsiat zawk rero tikah siseh mino thatha a relsiat zwk rero tikah zianghman mangbang ding a um lo. Anmai hrawk diriamnak ding a um loin an theih tikah, anmai lamtang cawimawi an si lo tikah anmai mibur, sungkhat rualpi tha le tanzawng in cawimawi an hlawh lo tikah an hmurka cu a za tiatia dingih relsiatnak tongkam in an awm sung a turh ut-uo tikah sup theih rual asi lo ti theihsak a tha.
Cuticun Falam khawlipi khal a rawp duahdo ih a sung um pawl khal tumsuk an pan sinsin ding. Milian le mifim fim in an tlansan vivo dingih an suahkeh nak khawlipi cu dunglet an hawih nawn lo. Falam khawlipi ah a rak um dah mi thiltha khal laksak vivo asi zo vekin a tang sun a um asile laksak vivo asilai ding. Falam mino pawl nan to men ding maw?
Falam mino pawl, ziang lamzin nan zawh ding? Nan hmurka kha zianghrangah nan hmang ding? Nan fimthiamnak kha zianghrangah nan hmang ding? Nan cahnak kha ziang hrangah nan hmang ding? Ziangtluk na cak timi hnakin na cahnak kha zo in a hlawkpi timi kha a thupi sawn lo maw? Ziangtluk na cak timi hnakin zo na neh timi kha a thupi sawn lo maw? Ziangtluk na cak timi hnakin zo na hum thei timi kha a thupi sawn lo awm? Ziangtluk na fim ti hnakin na fimnak ruangah zo a lung a awi timi kha a thupi sawn lo maw? Ziangtluk hlasak na thiam timi hnakin na hlasak thiam ruangah zovek thinlung di a riamter timi kha a thupi sawn lo maw? Tangka ziangzat na nei timi hnakin na sumpai neihmi ruangah mi rilrawng ziangzat an pum a puar ih mi ziangzat in hmasawnnak an nei timi kha a thupi sawn lo maw?
Hotu tha kan nei lo tiah phun zai rero nawn hlah uh! Mirang thufim in "people get leader what they deserve" an timi kha falam misa pawl hrang khalah a dik kan ti ko lo ding maw? Zir lai pawl zir sinsin uh, thiamnak theihnak sangsang nei dingin. Sumpai hawl pawl zuam sinsin uh la nan lennak khan nan miphun hrangah thiltha suahpi thei dingin thinlung forh aw sinsin uh la. Nan kiangkap ah mino zuri sabah in a um mi pawl kha bawm tumuh la ziangtin lamzin dik an zawh thei ding tiah thei tawk suah in bawm aw tawn uh. A tu ih kan upa pawl cu kumtin te tarlam pan vivo an si. A tu ah mino lai pawl in hmai nan hruai vivo a tul lai ding. A tu ihsin thinlungput tha lo, ruahnak thalo, senpi vangtlang thatnak siatsuah tu duh-amnak, hmai hmakhua sialnak, huat awknak, midang zawn ruah thiam lo nak pawl a hlo vivo lai dingih mi tamsawn thinlung ah mimal hlawknak hnakin senpi vangtlang thatnak ngai pawimawh sawn can a suak lai ding. Cutikah nan thinlung duhthusam hruaitu thatha tla nan nei lai ding. Senpi vangtlang thinlungin Chin miphun zapi huap in le kawlram pum huap in siseh leitlun thuanthu tuahtha tu ding dinhmun tiang hruaitu mino thatha pom thei dingin nan thinlung sangka a ong aw ih lungrual ten kekar tlang thei ding dinhmun nan thlen tikah kan miphun Pathian in nan duhmi le nan tul mi hruaitu thatha a lo pek lai ko ding ti khal zum ngam uhsi.
"Midang in ziangtin an lo rel, an lo tuahsia, an lo do, an lo eltai, an lo ti sia timi hnakin nangmah in ziangtin na let timi sawn in na hmailam lamzin a tuah tha in a tuah sia ding asi" ti kha theih hngilh lo ten, zuam tento uh. Salai Sun Ceu in "Khua tla a vang cingding" ativekin lai mino nan cantha suak cing hram seh tiah duhsaknak thawn,
Pathian in lam lo hruai vivo hram seh!
Lungawi,
HM
B.A.(Political Science), M.P.A. (Master of Public Affairs)
B.Th. Th.M. Cohen University and Theological Seminary (India Campus) .